Səni düşünürəm, səndən xəbərsiz,
Əyilib xəyalım yaddaş üstünə.
Fikrim sənsizliyin tutub əlindən,
Uçur bir naməlum, yad qaş üstünə.


Ruhumu əzmədə, sənsiz, hər nə var,
Əridir ömrümü küsgün duyğular.
Vüsal həsrətiylə ayrılmışam, yar!
Ətəyim sürüşüb atəş üstünə!


Taleyim uğursuz - gözündən qara,
Rüzgarmı günahkar? Nə söz rüzgara?
Azdı məhəbbətim, bilmirəm hara,
Od yağdı dumanlı bu baş üstünə.