Alış-yan, ay ürək!
Yana dur, səbrim!
Sən də, lal həyəcan, üzül dilimdən!
Çəkil gözlərimdən həsrətim, dərdim!
İlk görüş sınaqdı, bircə anla sən!
Gedəsiyəm mən!


Tutma ətəyimdən giley-güzarım!
Xəcalət, alnımı bəzəmə dən-dən!
Utanma, üz göstər, ay etibarım!
Axı söz vermişəm, özün bilirsən!
Gedəsiyəm mən!


A könül sirdaşım, nəğməli bulaq!
Gözünü yoluma bu gün dikmə sən.
Qayna əzəlki tək, axdığın tək ax!
Sevgi əsiriyəm daha bu gündən,
Gedəsiyəm mən!


Çoxdan vurğununam, gizli deyil bu!
Oxşaya bilməsəm bu gün səni mən,
İncimə! Bir işim düşüb, doğrusu...
Bir dəstə gül bağla aparım, Çəmən!
Gedəsiyəm mən!