QURBAN OLUM SƏNƏ VƏTƏN!


Kim nə deyir-desin, nə qəm,
Ruhum sənsən, Ana Vətən!
Bir an səndən ayrı düşsəm,
Ömürüm çatar sona, Vətən;
Qurban olum sənə, Vətən!


Ağlın ulu, eşqin ulu,
Səndən keçir haqqın yolu.
Gözün, könlün sevgi dolu,
Məhəbbətə binə Vətən,
Qurban olum sənə, Vətən!


Yağı yortdu düzlərində,
Qan üyüşdü gözlərində
Tab qalmadı dizlərində,
Uf-demədin yenə, Vətən;
Qurban olum sənə, Vətən!


Səhran qızıl, çölün qızıl,
Çayın qızıl, gölün qızıl,
Qəlbin qızıl, dilin qızıl,
Par-par yanır sinən, Vətən;
Qurban olum sənə, Vətən!


Bayrağın al, səfərin al,
Kəndlərin al, şəhərin al,
Axşamın al, səhərin al,
Çatmısan ağ günə, Vətən;
Qurban olum sənə, Vətən!
Qurban olum sənə, Vətən!