VƏTƏN EŞQİ!

Bir sevgi var ürəyimdə, Vətən üçün bəsləmişəm.
Neçə-neçə saf duyğumu bu eşq üçün səsləmişəm.


Gədik-gədik, yamac-yamac, kaha-kaha aramışam,
Bu sevgini varlığıma meşə-meşə sırımışam.


Cığır-cığır kirkidləyib, zirvə-zirvə düyləmişəm,
Qaya-qaya qulaqlayıb, dərə-dərə teyləmişəm.


Qaynar-qaynar bulaqlarda qaynaq tutub, dağ olub o,
Qoşalaşan ürəklərdə məndən əzəl doğulub o.


Vətən eşqi - bu ülvi hiss can odumdu, qanadımdı,
Qətrə-qətrə yaratdığım həyatımdı, muradımdı.


Bu sevgimi çox görməsin ömür mənə, ürək mənə,
Dinlə məni elim-günüm, bircə sənsən gərək mənə.


Dinlə məni, ümidlərim qönçə-qönçə üzülməsin,
Dinlə məni, bu eşqimə ilmə düşüb süzülməsin!