Get, daha neyləsən gecdi, qurtardıq!
Keçdi son ümid də, soğuldu, keçdi.
Keçdi sən gördüyün o günlər artıq,
Ötürmə köksünü, ötürmə, gecdi!


Gecdi ah-ufun da, yalvarışın da,
Bayağı görünür davranışın da!
Dayanıb yolumun hər qarışında,
Bezdirmə, bezdirmə, bezdirmə, gecdi!


Hardaydın eşqinlə dağ-dağ olanda?
Hardaydın ürəyim cızdaq olanda?
Hardaydın can sənə dustaq olanda?...
İtirmə vaxtını, itirmə, gecdi!


Daha neyləyirəm, nə mənası var?
Başım dumanlıdı, saç-saqqalım qar.
Adım dodağında qabar bağlayar,
Gətirmə dilinə, gətirmə, gecdi!


Elə fərz eləyək, bağışladım mən,
Könül ki, dönəsi deyil sözündən.
Tökmə günahını, tökmə gözündən,
Gecdi, gecdi daha, hönkürmə, gecdi.