Vaxt gələr ki, quzeylərə gün düşər,
Dağlar cavanlaşar, inşaallah. qardaş!
Bulaqlar üstündə buğlama bişər-
Dağlar cavanlaşar, İnşəAllah qardaş!


Daşnaklar canına qorxu çəkəndə,
Gözlərindən qanlı yaşlar tökəndə,
Qartallar zirvədə qiyya çəkəndə -
Dağlar cavanlaşar, İnşəAllah, qardaş!

Təndirlərdə buğda kömbəsi şişər,
Əmlik də kəsilər, kabab da bişər,
Düşmənin başına daş-qaya düşər,
Dağlar cavanlaşar, İnşəAllah, qardaş!

El-obamız yurdumuza yığılar,
Mağarlar qurular, küştü tutular,
Pərən-pərən olub, yadlar dağılar,
Dağlar cavanlaşar, İnşəAllah, qardaş!

Cavan qızlar oğlanları öyəndə,
Dəstə-dəstə Novruz aşı yeyəndə,
Vüsal da həvəslə şeir deyəndə
Dağlar cavanlaşar, İnşəAllah, qardaş!