Dincəlmək istədim bir daşın üstə,
Daş da qərib gəlir adama, Allah!
Cavan gəlinlərin gözünün üstə,
Qaş da qərib gəlir, adama, Allah!

Hanı pendir ilə dolu dağaran,
Ata ocağında qalıb nigaran,
Beş ilin içində tamam ağaran
Baş da qərib gəlir adama, Allah!

Günü-gündən gəlir qəm üstə qəmim,
Düyü həmin düyü, dəmləyən həmin,
Ocaq həmin deyil, Onunçün yəqin,
Aş da qərib gəlir, adama, Allaha!

Kor olsun bu zülmə şəst ilə baxan,
Vüsalın qəlbini yandıran, yaxan,
Pirani qocanın gözündən axan
Yaş da qərib gəlir adama, Allah!
Vətəndən uzaqda yüz il yaşasan...
Yaş da qərib gələr adama, Allah!