MƏN...!

Sızlama, ay ürək, göynəmə belə,
Hələ şimşək olub çaxasıyam mən!
Hər nə demişəmsə, sısqa demişəm,
Hələ leysan olub yağasıyam mən!

Hələ bu dünyaya səfərim durur,
Hələ gizlədiyim hünərim durur,
Hələ çalınmayan zəfərim durur,
Hələ könüllərə axasıyam mən!

Zər qanad istərəm, uçam göylərə,
Əlçatmaz, ünyetməz ənginliklərə!
Alnı min düyünlü anamız Yerə
Ulduz dünyasından baxasıyam mən!

Yolda qalmışlarım yolumu gözlər,
Dildə qalmışlarım dilimi gözlər,
Əldən qalmışlarım əlimi gözlər,
Hər işdə yekuna çatasıyam mən!

Vüsalam, eşqimdən alışıb dilim,
Yanıram, görünmür alovum, külüm.
Səni də üzmüşəm, qınama gülüm,
Sözümlə dağları yarasıyam mən!