Toxunma sən tarın incə siminə
Payız buludutək dolan qadın var
Həyat hekayəsin qəmə kökləyib
Qəmli notlar ilə çalan qadın var

Ömrünün ən soyuq küləyi əsən
Eşq dolu ürəyin sazaqlar kəsən
Xoşbəxt olmaq üçün yaman tələsən
Ömrünü borana salan qadın var

Əzab yorğanına bəzən bürünüb
Saxta gülüşlərlə xoşbəxt görünüb
Yeriyib yıxılıb gah da sürünüb
Arzular bağçası talan qadın var


AYNURƏ İNCİ