YARADIB

Nələr söyləyib neçəsi,
Hərə bir dastan yaradıb.
Bağbanı bağ yaradıbsa,
Bağı da bağban yaradıb.

Kürə içindədi kürə,
Kürələr də cürə-cürə.
Göyə ulduz səpib, Yerə
Kamallı İnsan yaradıb.

Arağa üzüm cecəsi,
Fərəyə xoruz beçəsi,
Sıldırıma dağ keçisi,
Düzə də Ceyran yaradıb.

Qulaqdan asıbdı sizi,
Gözə qul edibdi bizi.
Siri nədir, bilir özü,
Hər dərdə dərman yaradıb.

Hər zülümə dözə-dözə,
Minnətçidi tikə közə.
Sizi bizə, bizi sizə,
Yaradan qurban yaradıb.