Aşıq Telman Kerimova ithaf

Uca zirvələri qoyub gəlmişik,
Həsrətdən, hicrandan doyub gəlmişik.
Ayları, illəri sayıb gəlmişik,
“Yanıq Kərəmi” çal, ağlayaq Telman.

Əkdiyi tikanlar bitdi keşişin,
Keşişlər dəyişməz heç vaxt vərdişin.
Bir sonu görünmür hələ bu işin,
“Yanıq Kərəmi” çal, ağlayaq Telman.

Qovub çıxartdılar cənnətdən bizi,
Duman, çən bağladı yolları, izi.
Dağlara çırpdılar saf eşqimizi,
“Yanıq Kərəmi” çal, ağlayaq Telman.

Günəşin nuruyla qalxdıq, oyandıq,
Hər yalançı vədə, sözə inandıq.
Nakam məhəbbətin oduna yandıq,
“Yanıq Kərəmi” çal, ağlayaq Telman.

Saldı dərdə, qəmə Xan Əsli bizi,
Həsrət kor eylədi gözlərimizi.
Ayrılıq qatladı dizlərimizi,
“Yanıq Kərəmi” çal, ağlayaq Telman.