BAYRAMIN MÜBARƏK ANAM!

Yaz gəlir, gül əkir Yurd sinəsinə!
Bu güllü bayramın mübarək, Anam!
Hər yaxşı nə varsa diləyim sənə,
Yaraşsın hüsnünə ağbirçək Anam!

Gözümde nurun var, nəğməmdə laylan,
Hər ana deyəndə can demisən, can.
Mənə balam deyib, bağrına basan,
Qoynun isti yuvam ay göyçək Anam!

Gelişim gurultu, gedişim sükut,
Sürünür arxamca bir baxış bulud...
Qüssəni yelə ver, kədəri unut,
Nə ağrı, nə acı, nə qəm çək, Anam!

Sən mənim qibləmsən, qibləgahımsan,
Səcdəyə getdiyim səcdəgahımsan,
Sen, mənim cənnətim, sən dərgahımsan,
Varlığın dünyama bər-bəzək, Anam!