Mən sənə nəzərən qurulmuş saat,
Tükənib bitməyən uzun yollaram.
Sən uzaq görünən kiçik ulduzsan,
mən sənə uzanan qısa qollaram.

Sən şəhər içində yox olmuş küçə,
o küçə içində batan gəmisən.
Heç kimsə bilmir ki, sən illər öncə
buraya haradan çıxıb gəlmisən.

Mən isə quruda batan gəmiyə
çox kiçik yaşımda aşiq olmuşam.
Ağılsız başımla aşiq olmuşam.
Gözümdə yaşımla aşiq olmuşam.

Nə sözün varsa de,
yubanma,
tələs,
tökülüb yarpağım budaqlarımdan...
bugün var idimsə
sabah olmaram.

Mən sənə nəzərən qurulmuş saat,
Mən sənə uzanan uzun yollaram.