Haqsızlıq etmədim yoxluğuna mən,
yenə də səninəm səndən xəbərsiz.
Yenə də mənimsən məndən xəbərsiz,
çayımdan xəbərsiz,
dəmdən xəbərsiz
bir çayın xətri var aramızda.
Gəl.
Bu eşqin haqqını bu gecə verək.
Bu gecə çay da var yanımızda.
Gəl.
Bu gecə ay da var yaramızda.
Gəl.

Bağçamda sən adlı çiçəklərim yox.
Həsrətəm səsinə,qoxuna,
çiçək.
Bir parça ləçəyin qalıb yanımda.
bir parça mənimsən...
bir qədəh içək.

İçək ki, bir olan iki görünsün.
İçək ki, saçların sünbül hörülsün.
İçək ki, ötəni yada salaq biz.
İçək ki, əbədi olsun gecəmiz.

Əzizim...

Heç yadımdan çıxmaz
qorxulu bir gecə
yağışdan çıxıb biz yağmura düşdük.
Tək bizdən ibarət şəhərdə idik.
Çətirsiz gəlmişdik,
çətin görüşdük.