ZAMAN

Tələsmə vaxt özü tələsən deyil,
Onsuz da hər işi görəcək zaman.
Bir səhər həyata göz açırsa bil,
Bir axşam həyatdan köçəcək insan.

Həyatın qanunu belədir, belə,
Gərək verməyəsən günləri yelə.
Hər yerdə arxanı söykəsən elə,
El səni qabağa çəkəcək inan.

Ay Vüsal, şöhrətin fikrini çəkmə,
Xəyal yollarına gözünü dikmə,
Tabe ol həyatın verdiyi hökmə
Vaxtında hökmünü verəcək zaman.

#VusalAgayev