Çıxdım zülmətdən işığa,
hər yer dumandı gördüm.
Talelə üz-üzə gəldim,
üz-gözüm qandı gördüm.

Gərək işıq yanana yox,
it hürənə gedəsən.
Mən də getdim, itlər susdu,
işıqlar yandı gördüm.

Bir qapını döyən kimi
on pəncərə açıldı,
Hər açılan pəncərədən
bir div boylandı gördüm.

Qorxdum qaçdım dəli kimi,
nəfəsim kəsilincə.
Döndüm gördüm qovan yoxdu,
qorxum yalandı gördüm.

Oturdum bir daş üstündə,
nəfəsimi dərməyə,
Dərdiyim son nəfəsimdi,
ömür tamamdı gördüm.