Bir az da darıxmaq kimi...
Əzbərlədim dərdi- səri.
Fikrimə qazdığım qəbir,
Yanağının çuxur yeri ...

Bir az da darıxmaq kimi...
Qəzəbi var sol yanımın.
Barmaqlarım addımlayır,
Cığırlarını alnımın.

Bir az da darıxmaq kimi...
Baxıram fotoşəklinə.
Həsrətin rəsmi ağ- qara,
Ayrılığın bəs şəkli nə ?!

Bir az da darıxmaq kimi...
Yanır siqaret halıma.
Kül qabıdan kül ələnir,
Bu bozumtul əhvalıma.

Bir az da darıxmaq kimi...
Masamın üstü qarışıq.
Qədəhlərlə öpüşürəm,
Xəyal günaha bulaşıq…

Bir azda darıxmaq kimi...
Ölümün qoxusu gəlir.
Açılmır göz qapaqları,
Ömrümün yuxusu gəlir...

Ramil Mərzili