Dalğın baxışım yol çəkir hər gün neçə dərdə,
Fikrim dolaşır gəzdiyimiz dar küçələrdə,
Göy, ay doğur öldürmək üçün sanki səhərdə,
Allah dağıdır sanki mürəkkəb günəş üstə,
Qəm çəkməyimim üçün yığılıb dəstəbədəstə
hər şey bu stolda.

Dəftər- qələmim soldadı, külqabı sağımda,
Ard- arda calanmış siqaretlər damağımda,
Hirsimdən əzilmiş şəkilin də qabağımda.
Fonda “Ləpələr” musiqisi qəmli seçimdə,
Vermir adının haqqını, söndürmür, içimdə,
Hicran odu artır.

Ağlım çəkilir nazlı xəyalın ilə küncə,
Qalxır tavana sarı tütün tüstüsü incə.
Küllər tökülür dərdimə, köz isə sevincə,
Bitmiş tütünün barmağımı yaxmağı birdən,
Əfsus ayırıb ruhu şirin xatirələrdən.
Qaytardı həyata.

Artıq, açır öz sübhünü aləmlərə Tarı,
Azan səsini yel gətirir ruhuma sarı,
Qəlbim tələsir şövq ilə zikr etməyə yarı
Ancaq bu cürə yetdirirəm müşkülü həllə,
Allaha dua eyləyirəm qəmli qəzəllə,
Bir bəndəsi üçün.

Elnur Əliyev