Bu dünya heç kimə qalası deyil,
Bir göz qırpımında yıxır insanı.
O qədər darıxdım bir Allah bilir,
Nə edim məzarın soyuqdur Ata.

Darıxmaq üzülmək əlimdə deyil,
Canımdan bir canı itirmişəm mən.
Səhərdən axşama gecə düşəndən,
Gözlərim yaşardı ağladım Ata.
***
Öləndə ölməyə məni gözlədin,
Gözümün önündə arxayın öldün.
Ah çəkib göylərə elə inlədin,
İnana bilmirəm ölmüsən Ata.

Tabutu apardım məzara kimi,
Dərdin tabutundan ağır gələrmiş.
Çarəsiz qalmağım yumdu dilimi,
Ölərdim ölümünü görməzdim Ata.
***
Hər kəsin yanında gözəl hörmətin,
Dostların var idi deyib gülürdün.
Yaşasan arxalı dayaqlı idim,
Görürsən indi tək qalmışam Ata.

Bu dünya fanidir tam anlamışam,
Enişini yoxuşunu düzünü gördüm.
Hər şeyin hər cürə üzünü gördüm,
Sınaqdan çıxmışam qanmışam Ata.
***
Getdiyin yollarda gözüm axtarır,
Ara bir rastıma çıxardın mənim.
Atalı günlərim çox uzaqdadır,
Sən öldün atasız qalmışam Ata.

Hərdən düşüncələr bir olmasa da,
Səninlə qəlbimiz bir olub bizim.
Azadın canından bir can ayrılıb,
Od tutub içimdə yanmışam Ata.