GÖZLƏRINDƏ QALMIŞAM.

Gözlər qəlbin aynasıdır deyirlər,
Sənin gözün qəlbin qədər gözəlmiş.
Gözlərini süzüb mənə baxandan,
Ürəyimdə eşq atəşi közərmiş.

Rəssam kimi qara rəngli qələmlə,
Xumar gözə, nazik sürmə çəkmisən.
Qoy gözlərin gözlərimə alışsın,
Baxışını baxışımdan çəkmə sən.

Gözəl var ki, gözlərində qəm yükü,
Sənin gözün ətrafına nur saçır.
Bir cüt gözdə böyük ürək sevgisi,
Baxışların səadətə yol açır.

O gözləri dəyişmərəm dünyaya,
Sevgi dolu baxışına dalmışam.
Neçə vaxtdır axtarıram özümü,
Yəqin azıb gözlərində qalmışam.

✍️ Bəxtiyar Nemətli