Elə böyütmüşdüm gözümdə səni,
Hopmuşdun qəlbimin qan yaddaşına.
Acı xatirətək yazılıb adın
Ölən duyğuların məzar daşına.

Güvəncim sonsuzdu bu yolda sənə,
Sanırdım gözümdə mən səni bir dağ.
Acılar içində qovrulduqca mən
Gülürdün kefi kök,damağı da çağ.

Nəyini sevmişdi bu dəli könül?
Ürəyin işindən ağıl baş açmır.
Səni qınamıram,bu bir gerçək ki,
Qorxaq ürəklərə sevgi yaraşmır!

Silinsin yaddaşdan o sənli günlər,
Hər səni andıqca təzələnməsin.
Acı xatirələr bir kino lenti-
Gözümün önündə çözələnməsin.

Demişdin unudum,çətindən çətin,
Göstər unutmağın yolunu mənə.
Mükəmməl oynadın yenə rolunu,
Alqışlar,vəfasız,alqışlar sənə!

Ülviyyə ibrahimova