Bu gün kədərimin doğum günüdür
Bu gün də neçəsə yaşı olacaq
Yenə bir təsəlli tapacaq ürək
Qonağı gözümün yaşı olacaq..

Yenə çəkiləcək geriyə yuxum
Dəli düşüncələr keçəcək önə
birazdan şam kimi yanacaq içim
Gözləyir otağın işığı sönə..

Bilirəm,bilirəm hardasa biri
Dinləyir səsimi,eşidir məni
Bəlkə də indicə əlimi tutub
Əlinin istisi əridir məni..

Ehh..bu acı yuxuya bənzəyən ömür
Gözümdən tökülür ovuclarıma
Gecədən dan yeri sökülənəcən
Dualar sökülür ovuclarıma

Deyəsən səhərə çox ümid qalıb
Darıxır otağın soyuğu belə
Elə bil ikiyə bölünüb ölüm
Yarısı elədir ,yarısı belə...

Mürvətov Qüdrət