Görürəm məqsədin, yolun dəyişib.
O isti ürəyin buza dönüşüb.
Yar sənə son dəfə bir işim düşüb.
Mənə unutmağın yolunu göstər

Bax, indi görünmür gözlərdə nəmin.
Mən yoxam zərrə yox kədərin qəmin.
Sən yaxşı bilərsən bu işin çəmin.
Mənə unutmağın yolunu göstər

Bəlkə unutmaq üçün mən ölməliyəm.
Məsləhət ver mənə, neyləməliyəm.
Bu yola sənintək bələd deyiləm.
Mənə unutmağın yolunu göstər.

Demirəm sən yalvar, ayağıma düş.
Hər yanda axtarıb, sorağıma düş.
Yolu tanımıram, qabağıma düş.
Mənə unutmağın yolunu göstər.

Əziyyət çəkirəm, axı görürsən
Hər yada düşəndə əzab verirsən .
Sən bu unutmağı necə edirsən?
Mənə unutmağın yolunu göstər

Fariz Teymuroglu