1

Ürəyim eşqimdir eşq ürəyimdir,
Qıyma öz əlimlə didim eşqimi.
Göydən enmiş mələklərin diliylə,
Bu gecə Tanrıya dedim eşqimi.

Səni xatırlayıb bil düşünərkən,
Nəfəs lmağı da unuduram mən.
Arzum Tanrıdandı xahişim səndən,
Qoyma tərk eləyib gedim eşqimi.

Nə üçün kəsildin eşqimə qənim,
Öyrətdin əl açıb sənə dilənim,
Ürəyin məzarım eşqin kəfənim,
Kəfənsiz dəfn etmə yetim eşqimi.

2

Sevgimin şəriki olmayan gözəl,
Səninlə dərdimi bölməyə gəldim.
Əlvida sözünü deyib sonra da,
Saçına nərgizlər hörməyə gəldim.

Vüsalın köçkünüm, hicran məskənim,
Qismətim olubur ayrılıq mənim,
Bir zaman üzündən öpərdim sənin,
İndisə gözündən öpməyə gəldim.

Sevgindən olmuşam ürəyi xəstə,
Əzrayıl dayanıb başımın üstə,
Sürünə-sürünə bu son nəfəsdə,
Sənin qucağında ölməyə gəldim.