Üzümü muzeyə qoyuram bu gün,
Çünki sən öpmüsən yanaqlarımdan,
Həyatdan gözəllik duyuram bu gün,
Nəsə gözləyirəm sabahlarımdan.

Gözümü muzeyə qoyuram bu gün,
Gözünlə göz- gözə baxıbdı çünki,
Izimi muzeyə qoyuram bu gün,
Izinin üstünə çıxıbdı çünki.

Közümü muzeyə qoyuram bu gün,
Axı atəşinlə yanıb, bişmişəm.
Gərək sevgi nədir ayıram bu gün,
Dirilik suyudur sanıb içmişəm.

Sözümü muzeyə qoyuram bu gün,
Sənə ünvanlayıb, sənə demişəm.
Məni gözləsə də uzağa sürgün,
Yenə susmamışam, yenə demişəm.

Ruhumu eşqinlə yuyuram bu gün,
Kim deyir sevməklə xəta etmişəm?
Özümü muzeyə qoyuram bu gün,
Çünki, sənin üçün fəda etmişəm.

Raqif Raufoğlu