Məndən uzaq olma bir an,
Görə bilsin gözüm səni.
Gah aşıkar, gah da pünhan
Vəsf eləsin sözüm səni.
Demə sənsiz ürək dözər,
Xəyalım da səni gəzər.
Yollarıma sal bir nəzər,
Qoy gətirsin izim səni…
Bu dünyanın işığı bol,
Sən də mənim qəlbimə dol.
Şeirim ol, hekayəm ol,
Sətirlərə düzüm səni.
Bir gül olum eşq bağında,
Bülbülüm ol budağımda.
Yanaqların yanağımda -
Hiss eləsin üzüm səni.
Sən mənimsən, mən səninəm,
Eşqin ilə yanır sinəm.
Bu sevdadan çətin dönəm,
Sevəcəyəm özüm səni!...