Mənə sənin eşqin, qəlbin gərəkdir,
Ürək tellərimi çəksin tarıma.
Könül nə arzular, bilirsənmi heç?
Əllərim toxunsun qoy saçlarına.

Görünür razısan öz taleyindən,
Məni nə zamandır soraqlamırsan?!
Sənsiz saçlarıma qonub xeyli dən,
Ömür kitabımı varaqlamırsan.

Sənsiz sevinmərəm, sənsiz gülmərəm,
Qəlbim bir quruyan dənizdir indi.
Səni özgəsindən ala bilmərəm,
Səadət hamıya əzizdir indi.

Məni qəmli görsən əgər yollarda,
Bil ki, bu qəm sənin, kədər sənindir.
Mənim fikrim harda, səninki harda,
Günlərim keçsə də hədər sənindir.

Məndən əbəs yerə qaçırsan, əbəs,
Keçirsən yanımdan səssiz-səmirsiz.
Qəlbini sıxırmı mülayim bir səs,
"Bir zaman sevmişik, sevilmişik biz"